Me spektakël dhe gola, Liverpooli ia shkakton humbjen e parë sezonale Manchester Cityt (Video)

Me spektakël dhe gola, Liverpooli ia shkakton humbjen e parë sezonale Manchester Cityt (Video)

Në një ndeshje spektakolare në Anfield, Liverpooli e ka nënshtruar liderin e Ligës Premier, Manchester City, duke e mposhtur me rezultat 4-3.

Mjaftuan nëntë minuta lojë për t’u zhbllokuar rezultati. Alex Oxlade-Chamberlain krijoi hapësirë drejt kundërshtarëve të tij dhe lëshoi një goditje që u ndal në portën e Ederson.

(Foto: Getty Images)

Mysafirët ia dolën ta barazonin rezultatin para se skuadrat të shkonin në pushim. Leroy Sane pranoi një top në krahun e majtë, shkoi vetëm përpara dhe e mposhti portierin Loris Karius (40′).

(Foto: Getty Images)

Spektakli vazhdoi në gjysmën e dytë. Nicolas Otamendi, Oxlade-Chamberlain dhe Mohamed Salah patën rastet e tyre për skuadrat respektive.

(Foto: Getty Images)

Në minutën e 59-të, Oxlade-Chamberlain e gjeti për mrekulli Roberto Firminon, i cili e kishte vërejtur portierin Ederson se kishte dalë përpara dhe e paraboloi.

Menjëherë pas ishte në rast Sadio Mane, mirëpo goditja e tij u përplas në shtyllën e djathtë. Por, përpjekja e senegalezit u shpagua.

Salah e rikuperoi një top nga lojtarët e Cityt dhe asistoi te Mane, i cili me një goditje mbresëlënëse e shënoi golin e tretë të Redsave (61′).

(Foto: Getty Images)

Disa minuta më vonë erdhi momenti i Mohamed Salah. Një dalje e gabuar e portierit Ederson e dërgoi topin vetëm deri te egjiptiani, i cili shënoi një gol të bukur nga largësia (68′).

Në minutat e mbetura të takimit, City arriti të shënonte dy gola. Fillimisht Bernardo Silva (84′) dhe pastaj Sergio Aguero (90’+2) bënë që minutat e fundit të ishin dramatike.

(Foto: Getty Images)

Sidoqoftë, skuadra e Jurgen Klopp ia doli të mbahej në minutat e mbetura për të regjistruar këtë fitore të rëndësishme përballë lideri të kampionatit anglez.

Kjo është humbja e parë e Manchester Cityt në sezonin 2017/2018 pas 20 fitoreve dhe dy barazimeve. Megjithatë, ekipi i Pep Guardiolas është larg rivalëve me 62 pikë të arkëtuara deri më tani.

Liverpooli tash është ngritur në kuotën e 47 pikëve nga 13fitore, tetë barazime dhe dy humbje. Të Kuqtë mbajnë vendin e tretë në tabelë me pikë të barabarta me Chelsean (në vend të katërt) dhe Manchester Unitedin (në vend të dytë) që ka një ndeshje më pak të zhvilluar.

Shkruaj koment

Emaili juaj nuk do te publikohet.
Fushat e kerkuara*